HomeАНТИСТРЕСЖуркиСтартува 5-от Струмица опен фестивал

Стартува 5-от Струмица опен фестивал

Денес во Струмица ќе започне петтиот „Струмица опен фестивал“ кој во наредните девет дена ќе понуди музика, уметност и забава за струмичани и сите заинтересирани посетители.

– На сцената во Градскиот парк во Струмица, денес во 20:30 часот ќе настапат учесниците на детскиот фестивал „Јо Јо“, по што ќе следуваат кореографија на Денс батл, настап на струмичките рапери Дивизија, а потоа и танцов натпревар. Во недела ќе се одржи веќе традиционалниот концерт на лицата со телесен инвалидитет, а потоа ќе има и настап на стенд ап комичарите Марјан Ѓоргиевски и Никола Тодоровски, откри Томи Печков, претседател на Здружението на граѓани „Културно- забавен живот“.

Организаторите велат дека токму ваквата богата културно-забавна програма, независна од главните три музички вечери, го прави Струмица опен фестивалот уникатен од сите летни манифестации што се одржуваат во државата.

– Во понеделник во езерцето во паркот ќе се одржат два настана, изложбата „Будење“ на деца со посебни потреби и вечер на поезија, а во амфитеатарот ќе се одржи концерт на учесниците на летната школа на гитара кои пет дена ќе бидат дел од работилницата, појасни Печков.

На програмата на фестивалот е и трката на келнери и настап на групата „Летечки пекинезери“ како дел од џез-сцената, а во среда ќе има изложба и промоција на монографија и графичка мапа на Ниче Василев и концерт на акустична гитара.

Фолклорниот дел ќе го исполни Вториот меѓународен фолклорен фестивал „Оро без граници“ на ансамблот „Тримери“ и гости од Турција, а потоа и вечерта на афоризми. На 12-ти, 13-ти и 14 август се предвидени концерти на домашни и балкански пејачи и диџеи.

– Идниот петок ќе се случува и кулминацијата на „Струмица опен фестивалот“ кога и очекуваме најголема посетеност како и досега. Музичките вечери ќе ги отворат Љубојна, Амадеус, Аца Лукас и Џамбо со Агушеви. В сабота на репертоарот се Хипнотизер, Влатко Стефановски, Архангел, Кад би био Бјело дугме, Брас брадрс и Плејмен. В недела  фестивалот ќе заврши со настапите на Силви бенд, Црвена јабука, Жељко Јоксимовиќ, Дуоз и Хаус Твинс, информираше Печков.

Буџетот на фестивалот е скоро 150 илјади евра, од кои 9 милиони денари се обезбедени од буџетот на Општина Струмица. Останатите се обезбедени од спонзорства и донации. Најголемиот дел, или околу 80 илјади евра, се наменети за музичкиот дел. Во фестивалските денови ќе бидат вклучени и 150 младински волонтери.

Social Media Auto Publish Powered By : XYZScripts.com