Собранието даде зелено светло за буџетот на Јанева, се уште фали половина тим

Катица Јанева ќе го добие бараниот буџет. Собранието на Република Македонија едногласно и без дебата го одобри буџетот за работа на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите.

Согласно Финансовиот план, средствата во износ од 63.420.428 денари се наменети за непречено работење и автономно функционирање на Специјалното обвинителство за последниот квартал од 2015 година.

Финансиските средства на Јавно обвинителство за гонење на кривични дела поврзани и кои произлегуваат од содржината на незаконското следење на комуникациите се наменети за исплата на средства за плати и надоместоци на јавните обвинители, плати и надоместоци на вработените во јавно обвинителската стручна служба, средства за набавка на стоки и услуги, трошоци за време на постапките, вклучувајќи и средства за советувања и мислења од експерти, средства за професионално унапредување, средства за одржување на просториите и опремата, како и капитални инвестиции на Јавното обвинителство.

Во меѓувреме, Јанева останува со само половина од бараниот тим, а Претседателот Петар Аневски изјави дека нема намера да закаже седница за барањето на специјалната обвинителка да бидат избрани уште 7 обвинители бидејќи специјалното обвинителство ќе постапува по над 30 предмети.