Со топлината од РЕК ќе се грее цела Битола
Владата на Република Македонија со потпишување на меѓувладиниот договор со Германија и финансискиот договор со KFW обезбеди 39 милиони евра, од вкупно 46,5 милиони евра кои што се потребни за изградба на системот за топлификација за Битола, Новаци и Могила. Останатите средства ќе бидат обезбедени од ЕЛЕМ. Идејата е да се воспостави централен топлински систем со искористување на отпадната топлина од РЕК Битола со што ќе се примени почиста енергија во насока на намалување на загадувањето, а ќе се обезбедат многу домаќинства, компании и државни објекти.
-Најголемата придобивка е елиминирањето на повеќе извори на загадување на животната средина. Значително ќе се намали употребата на нафта и огревно дрво во јавните објекти и во домаќинствата. Со тоа ќе се намали и загадувањето на општината, изјави вицепремиерот Зоран Ставрески.
Средствата се добиени со фиксна стапка која денеска се фиксира на само 1,5%. Тоа е најниска каматна стапка која што било кога била одобрена за инфраструктурен проект во Македонија и претстува заштеда од над 3 милиони евра. Рокот на отплата е 15 години со 4 години грејс период.
-Голема чест е за мене што денеска сум дел од оваа церемонија за потпишување на договор за првиот систем за централно греење во вториот по големина град во Македонија, Битола. Овој проект е маркер на нашата плодна соработка со македонската Влада, а поради многу добрата соработка со нашите партнери од ЕЛЕМ и со голема поддршка од Министерството за финансии денеска го потпишавме меѓувладиниот договор како и договор за финансии кој достигнува 39 милини евра за реализација на овој многу важен проект за Битола, појасни заменик амбасадорот на Германија Ханс Халге Сендер.
Договорот е резултат на успешната соработка меѓу Владата на Република Македонија и германската банка во изминатите години со финансирање на повеќе значајни проекти.
Извор: kurir.mk