Се продава мотоциклот на Бетмен!
Мотоциклот користен за снимање на двата филма на Кристофер Нолан за Бетмен е еден од понудените предмети на интернет аукцијата за филмски меморабили. Продажбата беше организирана од страна на лондонската куќа „Prop Store“, а понуди ќе се примаат во наредните 22 дена. Мотоциклот со кој Бетмен крстареше по улиците на Готам во филмовите „The Dark Knight“ од 2008 година и „The Dark Knight Rises“ од 2012, наскоро би можел да заврши во гаражата на некој обожавател. Се очекува овој мотоцикл да достигне цена повисока од 95.000 евра.
Поради неконвенцијалниот дизајн, возачот на мотоциклот ќе мора да биде во „положба на Супермен“, а при управувањето да ги користи и рацете и рамењата. Мотоциклот на Бетмен кој ќе биде продаден е еден од осумте направени за потребите на снимањето на филмови на Кристофер Нолан.
Бетпод поседува 20-инчни тркала со „Hoosier“ гуми, како и „Хондин“ мотор од 750 кубици. Купецот ќе добие и сертификат од компанијата „Варнер Брос“. Мотоциклот не се наоѓа во состојба погодна за возење, изваден му е акумулаторот, резервоарот за гориво и контролите за гас, како и целата течност од моторот.