СДК: Филхармонија отворена само за сликање на раководството на ВМРО-ДПМНЕ

Објектот на Македонската филхармонија, кој во неделата се отвори со првиот свечен концерт, нема да биде готов уште најмалку половина година, велат вработените. Според нив, комплетирана била изведбата само на деловите кои се гледале на синоќешното свечено отворање, во останатите делови сѐ уште се работи па затоа и не можел да се направи технички прием на објектот.

„Реално, не може да се направи технички прием затоа што конструкцијата не е уште завршена. Сега за сега се завршени само влезните скали, ходникот до главна сала и главната сала, чисто за да се појават Груевски и екипата и да кажат дека они го направиле. Инаку, објектот нема да биде во целост готов во наредните 7-8 месеци“, објаснуваат за САКАМДАКАЖАМ.МК  извори од Филхармонијата кои сакаат да останат анонимни бидејќи не се овластени да даваат информации за јавност.

Тие што се овластени да зборуваат, упорно ги игнорираат нашите прашања зошто објектот беше пуштен во употреба без технички прием. Дури, на денот на отварањето не беше впишан ни во катастар.

Новата концертна сала со неколку паузи се градеше осум години, од март, 2009, на површина од 12.400 квадратни метри на просторот помеѓу Македонската опера и балет (МОБ) и Факултетот за музичка уметност (ФМУ). Скандал се случи во 2013, кога банкротираше австриската градежна компанија „Алпине бау“, па карабината продолжи да ја гради  скопската градежна фирма „Гранит“,  за  4, 7 милиони евра. По неколкумесечна стагнација, Министерството за култура  склучи договор со австриската  фирма „Штрабаг АГ“ за целосно внатрешно уредување на новата сала, вреден речиси 27 милиони евра.