САД со масовна акција против мафијата

Американското државно обвинителство соопшти дека покренало обвиненија против 46 криминалци, поврзани со мафијашките семејства. Спроведени се координирани акции на апсење на Федералното истражно биро (ФБИ) долж целиот Источен брег на САД.

Уапсените се обвинети за водење криминална организација која делувала од Масачусетс, па се до Флорида, а се занимавала, меѓу другото, со изнуди, подметнување пожари, измами, илегално коцкање, трговија со оружје и физички напади, пренесуваат француските медиуми.

Полицијата се сомнева дека уапсените се поврзани со мафијашките семејства од Њујорк со сицилијански корени – Џеновезе, Гамбино, Лукезе и Бонано, како и со семејните криминални групи од Филаделфија. Оваа акција покажува дека мафијата по десетина години повторно ги воспоставила криминалните активности и не е целосно искоренета.