Thursday, Mar 28, 2024
HomeДЕНЕШНАПолитикаОсмани: Не ми се допаѓа тајмингот на судот, но е показател дека е независен

Османи: Не ми се допаѓа тајмингот на судот, но е показател дека е независен

Протестите се легитимно и уставно загарантирано право на граѓаните и може да се прават секаде, сè додека не се насилни, изјави вицепремиерот за европски прашања, Бујар Османи, одговарајќи на новинарско прашање дали протестите на ВМРО-ДПМНЕ против последните приведувања и судството се политички притисок.

– Граѓаните имаат право да кажат мислење и за одлуките на судот, но ние не смееме да се мешаме во одлуките на судот. Можеби мене, како координатор за европски прашања, воопшто не ми се допаѓа моментот, но тоа докажува дека судовите не ги интересира политичката агенда и се целосно независни. Кога би избирал помеѓу моментот и независност, би ја избрал независноста – рече Османи.

Прашан за најавената средба со шефот на грчката дипломатија, Никос Коѕиас, Османи рече дека сè уште се работи на датумот и дека има интензивни контакти и градење на доверба на различни нивоа.

– Постои позитивна атмосфера за средбата со Нимиц за името, за што потоа треба да се обезбеди внатрешен консензус за да се најде решение – рече Османи.

Вицепремиерот изрази надеж дека опозицијата ќе даде поддршка на реформските процеси, иако последните настани влијаат на ситуацијата. Сепак, тој се надева дека опозицијата ќе биде конструктивна за т.н. наднационална агенда.