Ограбена редакцијата на Плусинфо

Редакцијата на порталот Плусинфо синоќа после 21.30 часот била обиена од засега непознати лица. Речиси целокупната опрема, која се состои лап-топ компјутери и фотографска опрема е украдена – истакнува порталот.

Последна која била присутна во редакцијата синоќа до 21.30 часот била фоторепортерката Елена Героска. Таа се вратила од настанот пред седиштето на ВМРО-ДПМНЕ, ги обработила фотографиите од настанот и потоа си заминала. Утринава, кога Героска дошла на работното место околу 9 часот, забележала дека балконската врата е ширум отворена и неа се забележуваат траги на насилно обивање. По алармирањето на уредниците, настанот веднаш е пријавен во полиција.

Освен што се украдени четири лаптопи и еден нетбук, украден е и поголем дел од исклучително скапата фотографска опрема и две видео камери. Интересно е што темелно било претурано по фиоките, а на подот се забележуваат расфрлани службени документи на редакцијата – фактури, проекти, списоци и слично.

Редакцијата на Плусинфо се сомнева дека фоторепортерката Героска била следена после синоќешната прослава на ВМРО-ДПМНЕ и дека сторителите смислено насилно влегле во редакцијата, со цел да нанесат и материјална штета, но и да ги заплашат новинарите. Од редакцијата на Плусинфо повеќе информации најаваија за утрешниот ден.