„Од убиство на животни до убиство на луѓе има само еден чекор“
Претставници на здруженијата за заштита и љубители на животните денеска напладне на плоштадот Македонија одржаа протест против изживувањето врз бездомните животни. Тие носеа транспаренти со пораки: „Од убиството на животни, до убиство на луѓе има само еден чекор“, „Правда за животните!“, „Убивате бездомни кучиња, да смеете ќе убивате и луѓе“.
Поголем број од демонстрантите дојдоа со своите домашни миленици. Протестот се одржува под мотото „Градот хуман пак ќе никне“, а организатор е Здружението за заштита на животните Анима мунди. Од Плоштадот Македонија, протестот продолжува пред Градското собрание. Таму тие ќе ги повторат своите барања.
– Итен прекин на убивањето во Вардариште, раскинување на договор за работа со Ветеринарната болница Автокоманда, а ветеринарите да бидат казнети за нехумано убивање во стационарот,
– Влез на активистите за заштита на животните во Вардариште како овластено тело за надзор на спроведување на Програмата на град Скопје,
– Отпуштање на дел од вработените во Вардариште препознатливи по нехуманоста кон кучињата
– Прекин на самоволното заловување на веќе стерилизирани, третирани и обележани кучиња,
– Забрана за заловување на малите кутриња, кои не се предмет на Програмата,
– Овозможување на граѓаните да си ги повлекуваат локалните миленици од стационарот
– Инспекторите на Град Скопје да запрат со изживување врз сопствениците на миленици и оние кои се грижат за животните,
– Најстроги казни за инспекторите кои ги надминале законските овластувања,
– Агенцијата за храна и ветеринарство да одговори на пријавите и да изрече соодветни и казни за секое институционално или индивидуално прекршување на Законот за заштита и благосостојба на животните.
извор:Новатв.мк