nowPARK.me ќе го смени паркингот во Скопје
Користејќи ги базите на отворени податоци од државните институции Јордан Крстевски и Ивана Талеска ја креираа одличната апликација nowPARK.me која е и првонаградена на Open Data Hackathon натпреварот. Покрај нив учестуваа 50-ина учесници, а имаа доволно време да ги реализираат своите идео во нов софтвер од 3 до 22 јуни.
nowPARK.me апликацијата му помага на корисникот да го пронајде најблиското паркинг место до зададената локација, а дава и информации за слободни места за паркирање. За почеток функционира во Скопје, но целта е да добие меѓународна примена бидејќи концептот е ефикасен и применлив секаде.
Втората награда ја доби Стеван Костовски за апликацијата SmartPhonebook, која ќе им помага на корисниците да знаат кој од нивните контакти го променил операторот и колку би ги чинел повикот. Третонаградени се Кристијан Арсовски и Дарко Котоски за апликацијата CultureApp, која ги прикажува сите театри и кина во Македонија и во која може да се погледне репертоарот на секој театар поединечно, да се купат и/или резервираат карти. Наградите на победниците им беа доделени од министерот за информатичко општество и администрација, Иво Ивановски и генералниот директор на Мајкрософт во Скопје, Стефан Плавјански.
Покрај изработка на квалитетни апликации за корисниците Министерот Ивановски оцени дека ваквите натпревари ја подобруваат сликата за пристапот до отворените податоци на државните институции.
– Република Македонија пристапи кон глобалната иницијатива за Отворено владино партнерство во 2011 година, како 32 држава, и за четири години направивме многу активности на овој план. Со отворени 154 бази на податоци, Македонија не само што е лидер во регионот, туку и пошироко и за тоа има признание од Институтот за отворени податоци, изјави Ивановски.
Генералниот директор на Мајкрософт во Скопје, Стефан Плавјански рече дека Open Data Hackathon натпреварот ќе стане традиционален и ќе се одржува наредните години. Компанијата Мајкрософт на најуспешните на натпреварот им додели мобилни телефони и таблет од новата технолошка генерација.