Нова демократија го нападна Каменос за радикалните изјави за Македонија – бара објаснување од грчкото МНР
Грчката десничарска партија Нова демократија бара официјално објаснување од грчкото Министерство за надворешни работи околу позициите на грчката влада за Македонија и спорот за името по новите радикални изјави на министерот за одбрана, Панос Каменос, пишува „Мета“.
Каменос во интервју за телевизијата „Скај“ изјави дека тој никогаш нема да прифати име во кое ќе фигурира зборот Македонија, но и дека спорот за името во моментов не е толку важен бидејќи не се знае дали државата воопшто ќе постои. Каменос, исто така, нагласи дека мнозинството граѓани во Македонија се со албанско потекло, но дека Грција во случај на судири треба да го заштити христијанското население во регионот.
Пратеникот на Нова демократија, одговорен за надворешна политика, Јоргос Кумуцакос, заедно со 18 други пратеници, остро ги критикува изјавите на Каменос и денеска преку писмо побара од грчкото МНР да ги објасни ставовите на грчката влада по овие изјави на Каменос.
Во писмото се нагласува дека грчката надворешна политика треба да се води одговорно и резервирано, особено во период кога е критична ситуацијата на Балканот и бараат да се објасни дали грчкото МНР ги поддржува ставовите на министерот за одбрана и коалициски партнер во владата на Алексис Ципрас.
„Го прашуваме министерот за надворешни работи дали се согласува со изјавите на министерот за одбрана? Дали позициите на министерот за одбрана за создавање „христијанси блок“ е официјална позиција на МНР? Која е официјалната позиција на државата во однос на името на БЈРМ – таа што ја има МНР или таа од изјавата на министерот за одбрана? Дали изјавите на министерот за одбрана се основата врз која се гради балканската политика на Грција“, се вели во писмото на Кумуцакос и на другите 18 пратеници на Нова демократија.
Каменос, кој е од десничарската Независни Грци, од самиот почеток има дијаметрално спротивни позиции од Сириза во однос на спорот за името и тврди дека нема да дозволи и да прифати користење на терминот Македонија.
