Нимиц има големи очекувања од новата влада да се посвети на спорот за името
Метју Нимиц смета дека штом се избере новата влада Македонија може да се посвети повеќе на изнаоѓање на решенија за спорот за името наметнат од Грција. Решавањето на овој проблем, според него, може да помогне да се надминат и други проблеми во регионот, вели Нимиц за грчки „Ријал Њуз“.
– Мандатот кој го имам за решавање на спорот за името е клучот кој ќе ја отвори вратата за да се решат и други спорни проблеми во регионот. Спорот може да се реши ако и двете земји и нивните лидери добијат поддршка од нивните народи, ако разгледаат нешто што е логично, што ќе го задржува достоинството на двете земји, идентитетот на двете земји, историската смисла на двете земји. Мислам дека постојат решенија, вели Нимиц.
Тој ги оценува како опасни и погрешни сите разговори и идеи за менување на границите, особено на Балканот.
– Границите треба да останат таму каде што се и мислам дека тоа што го нарекуваме ПЈРМ е една држава членка на Обединетите нации, признатa како држава од сите нејзини соседи, истакнува Метју Нимиц.
Тој апелира до Албанците во Македонија да бидат лојални граѓани, да придонесат за функционирање на државата и да работат во насока на демократско решавање проблемите.