Невработените со бесплатна обука полесно до работа

Две илјади невработени лица ќе имаат можност да посетуваат Обука за општи вештини за познавање странски јазик и компјутерски вештини за Microsоft Office апликациите, интернет и вештини за менаџмент. Оваа Обука ќе ја организира министерството за труд и социјална политика, Агенцијата за вработување на Република Македонија. Заинтересираните невработени лица ќе може да се пријават на огласот кој го најави министерот за труд и социјална политика Диме Спасов во Куманово, при посетата на штандот во рамките на промоцијата на проектот „Македонија вработува“.

– Заедно со Агенцијата за вработување обезбедивме грант средства од ЕУ преку ИПА програма  во износ од 200 илјади евра за овие 2.000 обуки за 2.000 невработени лица. Во моментот  трае огласот за сите активни баратели на работа. Со цел да бидат поконкурентни на пазарот на труд, потребно е невработените лица најчесто и неопходно е да познаваат странски јазик и општи познавања за компјутерски вештини и токму поради тоа ги спроведуваме овие обуки, објасни Спасов.