Нема професионални медиуми без солидарност, интегритет и слобода

Самостојниот синдикат на новинари и медиумски работници денес ја организираше конференцијата „ За медиумските работи“ со цел да ја развие дебатата за организација на медиумската сфера, заштитата на правата на медиумските работници, како и за склучување на Колективен договор на државно ниво за сите редакции.

Гости беа амбасадорот на Велика Британија Герет Едвардс кој всушност е и покровител на конференцијата, претседателот на ЕФН, Могенс Блишер – Бјерегард, потоа министерката за труд и социјална политика Фросина Ташевска Ременски, Јасмина Поповиќ од Синдикатот на новинари од Хрватска, Драган Глигориевиќ од Синдикатот на новинари на Србија и Димитар Буковалов претставник од МИОА кој говореше наместо министерката Марта Арсовска Томовска.

Дебата која се разви меѓу членовите на Синдикатот предводени од претседателката Тамара Чаусидис се фокусираше на подобрување на работничките права кои мора да бидат гарантирани за новинарите да може достоинствено да ја вршат професијата без да им се закануваат со казни, откази и деградирања.

Колективниот договор ќе ги регулира правата, но и обврските меѓу новинарите, уредниците и сопствениците на медиумите. Потребна е солидарност со секој новинар чии права се повредени, треба да се спречат уцените и мобингот на работното место, но и да се демонстрира личен интегритет за да се врати довербата во професијата на која сега и се наметнати пропагатори и извршители на нарачки.

Автор: Христијан Станоевиќ