На денешен ден пред шест години двајца играчи го променија тенисот
На денешен ден пред шест години е завршен најдолгиот натпревар во историјата на тенисот, велиме завршен бидејќи започна два дена порано. Во историјата на тенисот како играчи кои учествуваа во најдолгата средба влегоа Американецот Џон Иснер и Французинот Николас Мау. После 11 часа и 5 минути игра за период од три дена, Иснер славеше со резултат од 6:4, 3:6, 6:7, 7:6, 70:68.
Мечот започна во 18:18 часот во вторникот 22 јуни 2010 година, а беше прекинат поради мрак при резултат од 2:2 во сетови. Дури ни тогаш ништо не наговестуваше дека ќе бидеме сведоци на голем историски натпревар. Наредниот ден се вратија на теренот во 14:05, започна петиот сет, се играше, но крајот се чинеше дека е многу далеку.
Гледачите не можеа да поверуваат што гледаат на семафорот следејќи го резултатот, брејкови немаше, а во 17:45 мечот и официјално беше прогласен за најдолг во историјата и тоа при резултат 32:32.
Се уште не бевме ниту близу до крајот, дури и семафорот се расипа при резултат 47:47, а играта по втор пат беше прекината при резултат од 59:59. Конечно, на 24 јуни во 15:40 натпреварот почна повторно, се играше уште 67 минути за Иснер конечно да дојде до победа и нереални 70:68 во петиот сет.
„Кога заминував од теренот, навистина мислев дека се работи за сон, бев потполно изгубен и не мислев дека е возможно дека се случило вакво нешто“, изјави Иснер после големиот триумф.
Последниот сет траеше цели осум часа и 11 минути. „Само сервирав и се обидував да направам винер со помош на форхенд. Бев толку многу уморен, неможев да се концентрирам не бев свесен низ што поминувам. Веќе не го ни следев резултатот, после 25:25 заборавив на резултатот“, даде Иснер.