Мртва трка за вакцина помеѓу големите
Како во времето на „најладните денови од Студената војна“, кога во биполарно поделениот блоковски свет, суперсилите САД и СССР се натпреварувале во трката за наоружување и денеска големите и моќни сили и држави се натпреваруваат кој прв ќе дојде во вакцината за Ковид-19 вирусот. Светската пандемија од „непознатиот непријател“, отвори нови фронтови за докажување меѓу САД, Кина, Русија, но и земји како Турција, Норвешка, Велика Британија. Научно-истражувачки центри, се во мртва трка кој прв ќе му го претстави на светот спасот и излезното решение за кризата во која се наоѓа целата планета.
Русите се пофалија први со „ Спутник 5“на генерирачкото име на првата регистрирана вакцина против Ковид-19, по аналогија на првиот вештачки лансиран сателит на Земјата во 1957 година. Рускиот претседател Владимир Путин објави дека во Русија е регистрирана првата вакцина во светот за превенција од Ковид-19, изработена од Националниот истражувачки центар за епидемиологија и микробиологија „Гамалеј“, во соработка со рускиот фонд за директни инвестиции. Исто така, најмоќниот Русин, со јавноста сподели дека и неговата ќерка е вакцинирана и дека два дена имала температура, но веќе се чувствува добро и нема потреба од грижа од заразата во наредните една до две години.
Дали ќе почне „војна на силите“ со која ќе се обвинуваат чија вакцина е поквалитетна и е со подобри гаранција, а која е неквалитетна со неиспитано потекло, е само прашање на време. Во нетрпеливоста на најмоќните држави, пак на крајот ќе страдаат милиони луѓе, ширум светот кои во страв и нетрпение го чекаат излезот од светските здравствени власти. Министерот за здравство Венко Филипче, потенцираше дека нашата држава ќе купува и увезува вакцини кои ќе бидат потврдени само и исклучиво од Светската здравствена организација. Македонија по глава на жител, е една од најзаразените земји на европскиот континент со преку 6.000 заразени потврдени случаи на 1 милион жители, и со преку 270 починати граѓани.