Мигрантите во очајни напори да ја пробијат македонската полиција
Вчера околу 1500 мигранти кои немаат право на влез и повеќе денови се заглавени меѓу Грција и Македонија се обидоа со очајнички обиди да ја пробијат македонската полиција која ја чува границата.
Некои од нив клекнуваа на колена молејќи ги припадниците на безбедносните сили, а други пак се обидуваа да ја преминат оградата и да навлезат на македонска територија, пренесува Ројтерс.
Мигрантите кои не доаѓаат од воените жаришта во последната недела не се пропуштаат и кај нив се зголемува револтот, па најгласната парола е „Пуштете не или убијте не“.
Тензиите беа навистина големи и меѓу мигрантите малку фалеше да направат поголем инцидент со македонската полиција, особено во моменти кога се присутни светски медиуми кои за кратко ќе ја прошират веста насекаде.
Денес тензиите на граница се смирени, но доколку ваквата состојба се пролонгира и илјадници мигранти останат заглавени постои можност за ескалација. Сепак, одлуката за непропуштање на економските мигранти останува на сила и нема реакција од ЕУ.