Friday, Mar 29, 2024
HomeДЕНЕШНАПолитикаМАНУ бара стручна и научна расправа за законот за јазиците

МАНУ бара стручна и научна расправа за законот за јазиците

Пред усвојувањето на Законот за употребата на јазиците, треба да се отвори стручна и научна расправа за одделните прашања што ги регулира овој предлог-закон, со учество на експерти од различен профил – лингвисти (македонисти, албанолози, специјалисти од областа на ареалната лингивистика), правници и социолози.

Ова е ставот на претседателството на Македонската академија на науките и уметностите (МАНУ) по повод Законот за употреба на јазиците, кој е во собранска процедура со европско знаменце, односно треба да биде донесен по скратена постапка, пренесува „Слободен печат“.

Ваквата расправа, велат од претседателството на МАНУ, ќе придонесе подобро да се разберат предложените решенија, да се расчистат одделни недоречености што можат да создаваат проблеми при примената на Законот во практиката и да се разјаснат некои различни толкувања што се појавија во досегашната расправа.

„Македонската академија на науките и уметностите цврсто стои на гледиштето дека Република Македонија треба да ја градиме и да ја развиваме како демократско, економски просперитетно и европски ориентирано мултиетничко и мултикултурно општество. Предлог-законот за јазиците, респектирајќи го принципот на бројната застапеност на заедниците, значајно ја проширува и ја унапредува примената на албанскиот јазик во Република Македонија, за да се затвори едно отворено прашање, кое создава меѓуетнички тензии и по промената на Уставот на Република Македонија во 2001 година… За сите отворени прашања и дилеми поврзани со оваа проблематика пратениците во Собранието на Република Македонија, респектирајќи ги стручните и научните мислења, треба да иницираат конструктивна дебата, заснована врз принципите на отвореност, толерантност, заемно уважување и избегнување секаков вид ултимативност и исклучивост, сеедно од која страна тие и да доаѓаат“, стои во обраќањето на претседателството на МАНУ.

Оттаму додаваат дека јазичниот плурализам е иманентна карактеристика на мултикултурното општество и дека „легитимни се инсистирањата на заедниците за унапредување на нивните јазични права“.

Македонците, подвлекуваат од Академијата, „треба да го почитуваат тоа и да покажат интерес за јазиците на нивните сограѓани и за унапредување на нивните јазични права, култура и традиции, но, и обратно – претставниците на другите заедници мора да покажат разбирање, толерантност и респект за македонскиот јазик, како јазик на мнозинскиот народ, и за неговата интегративна, обединувачка функција“.