Карпошани повторно протестираа против урбанистичките планови

Жителите на општина Карпош денеска повторно излегоа на протест против деталниот урбанитички план за кој велат дека е донесен сомнително и нетранспарентно. Тие во 12 часот го блокираа сообраќајот на булеварот Партизански одреди, на крстосницата кај трговскиот центар „Скопје сити мол“.

Претходно, тие испратија и писмо до локалните власти во кое наведуваат дека Општина Карпош во ДУПот за Карпош 3 предвидува уште еден голем трговски центар, висок 30,6м на просторот спроти Сити мол каде сега има парк со возрасни дрвја и тениското игралиште. Незадоволните граѓани и минатата сабота го блокираа булеварот и најавуваат дека ќе протестираат сè додека не се изменат урбанистичките планови и не се спречи уништувањето на зеленилото во нивната населба.