Караџовски: Изборот на судии се прави за да нема застој во работата
Судскиот совет на денешната седница донесе одлука за објавување оглас за избор на претседател на Основниот суд Скопје 1, каде сега б.д. е Стојанче Рибарев, како и оглас за претседател на Апелацискиот суд Штип и за основните судови Куманово, Тетово, Дебар и Ресен, пишиува „Макфакс“ На обвинувањата на дел од експертската јавност дека е индикативно што токму сега се објавуваат огласи за избор на нови судии и претседатели на судови, кога на големо се подготвуваат реформи во правосудството, претседателот на Судскиот совет, Зоран Караџовски, вели дека станува збор за редовна активност бидејќи, според него, не можело да се дозволи застој во работата на судовите.
– Најавени се многу реформи во многу области, работата на судовите не може да запре. Неспорен факт е дека шест судови работат без претседатели. Ние објавуваме огласи во континуитет, така и сега. Што ако се распишат локални избори? Не е в ред нашата работа да биде запрена ако се распишат избори. ДКСК доставува мислење до сите органи и до нас и тоа нè спречува. Ние би направиле прекршок доколку во тој период правиме избори. Во тој случај ќе треба да правиме избор по одржувањето на локалните избори. Судскиот совет работи законски. Огласот ќе биде објавен, најверојатно, утре во Службен весник. Нека се пријават судиите што ги исполнуваат критериумите , имаат 15 дена, рече Караџовски.
Обвинувањата дека огласите се распишуваат од политички причини Караџовски ги оцени како тенденциозни и политикантски.
– Ние транспарентно ги објавуваме огласите, изборот се врши на јавна седница, а тие што нè обвинуваат дека сме некакви слуги на сегашна власт или бивша власт нека нè обвинуваат, мојата грижа е законско работење на Судскиот совет, додаде Караџовски.
Судскиот совет донесе одлука и за распишување оглас за избор на двајца судии во Врховниот суд, четворица во скопска Апелација и еден во Апелацискиот суд Битола. Во Врховниот суд ќе се избираат двајца кривичари. Двајца судии кривичари и двајца граѓански судии ќе се избираат во Апелацискиот суд Скопје. Во битолска Апелација ќе се избира еден судија кривичар.
