ЈП „Улици и патишта“ за исти работни места исплаќала различни плати
Државниот Завод за ревизија, во конечниот Извештај за 2015 година за Јавното претпријатие „Улици и патишта“, Скопје открива серија неправилности и изразува неповолно мислење за реалноста и објективноста на финансиските извештаи на претпријатието, пишува „Макфакс“.
Ревизијата констатира слабости при работењето на главниот магацин. Во Извештајот пишува дека основачкиот влог на претпријатието не е впишан во Централниот регистар, а одредени вработени за исти работни позиции, добиваат различни плати, поради неусогласеност со Правилникот за систематизација на работните места. Не е предвидена соодветна постапка за систематизација, и во целост не е применета сметководствената политика на претпријатието. За времето на кое се однесува Извештајот, директор на ЈП Улици и патишта е Синиша Ивановски.
Ревизорите препорачуваат надлежните да спроведат мерки и да ги отстранат недостатоците.