Иванов се сретна со Хојт Ји: Заев да ја гарантира унитарноста, па ќе добие мандат

Претседателот Иванов на денашната средба со претставникот на Стејт Департментот Брајан Хојт Ји ги повтори своите позиции но, во омекната варијанта дека Зоран Заев може да добие мандат само ако даде силни гаранции дека нема да ја загрози унитарноста на Македонија.

Македонскиот претседател го осудува секое политичко и физичко насилство во Република Македонија и истакна дека единствено преку дијалог мора да се бараат решенија. Претседателот Иванов подвлече дека доколку постои вистинско лидерство од претседателите на парламентарните партии, правната и политичката пречка за определување на мандат за состав на Влада се надминливи.

Македонскиот претседател побара од САД, како стратешки партнери на Република Македонија, да помогнат за пречките да се отстранат и да се овозможи парламентарното мнозинство да го добие мандатот.

Преседаните со кои се воведува практика, а нелегалното станува легално ги поткопува основните демократски принципи, рече претседателот Иванов.

Претседателот Иванов бара од лидерот на СДСМ да го исполни јавно искажаниот збор дека „заедно со коалиционите партнери ќе дојдат и ќе обезбедат гаранции за зајакнување на унитарноста на државата и дека сè ќе биде во согласност со Уставот на Република Македонија“.

Платформата од Тирана не може да биде услов ниту, пак, основа за формирање Влада во Република Македонија, констатираше македонскиот претседател.

Претседателот Иванов повика граѓаните да останат воздржани и трпеливи, затоа што постојат решенија кои треба да се донесат со разум и преку дијалог.

Извор: novatv.mk