Иванов бара правници да ја повлече аболицијата за тие што сакаат

Претседателот Иванов се консултира со правници за наоѓање на законски можности со кои би ја повлекол аболицијата за политичарите кои јавно, но и писмено се обратија до него да ја поништи одлуката која се однесува кон нив.

„Консултациите продолжуваат во насока на изнаоѓање решение. Ги повикувам и лидерите на политичките партии, потписници на Договорот од Пржино, и тие да се вклучат во овој процес и да понудат правно решение што ќе биде во согласност со Уставот и законите на Република Македонија“, вели претседателот Иванов.

Сепак и понатаму Иванов стои на ставот дека неговата одлука била правилна и во согласност со Законот и Уставот иако доби огромни критики дека целосно го суспензираше правниот систем во Република Македонија и овозможи лица осомничени за тешки кривични дела и измами да бидат аболицирани пред воопшто и да започне било каква судска постапка. СЈО исто така понуди правна помош за да ја повлече аболицијата.