Friday, Mar 29, 2024
HomeДЕНЕШНАСветИндија се уште лови вештерки

Индија се уште лови вештерки

Инквизицијата одамна умре, а Индија се уште лови вештерки. На една Индијка и е отсечена главата откако била обвинета дека е „вештерка“ и дека таа е „виновна“ за појавата на болест во селото Сонитпур, во сојузната индиска држава Асам.

Во соопштението на локалната полиција се вели дека 63-годишната Пурни Оранг прво била прогласена дека е одговорна за заболувањата меѓу луѓето во оваа племенска населба, а потоа изведена на судење, осудена на смрт и брутално ликвидирана. Полицијата соопшти дека седум лица, меѓу кои и две жени се уапсени и осомничени во врска со убиството на Оранг.

Според податоците со кои располагаат властите во Асам, во изминатите шест години, околу 90 лица, во најголем број жени, се казнети и убиени со отсекување на главите или се живи запалени, пренесе МИА. Најчестото обвинување за сите жртви е „вештерството“. Станува збор за селски средини и за племенски заедници на луѓе кои во најголемиот број работат на бројните плантажи со чај во оваа индиска држава.

Во октомври минатата година, една индиска спортистка беше брутално претепана, откако во провинцијата Асам беше обвинета за „вештерство“. Властите признаваат дека суеверието и религиозните заблуди се длабоко вкорнети меѓу населението во руралните средини, но често се случува како „вештерки“ да бидат обвинети вдовици и да бидат брутално убиени, за да им се одземе имотот и земјиштето што го поседуваат.