Хелсиншкиот комитет го поддржа штрајкот на текстилните работници од Крива Паланка
Хелсиншкиот комитет за човекови права денеска го поддржа штрајкот на текстилните работнички и работници од Крива Паланка, вработени во Друштвото за производство на чевли и трговија КАДОРО ОТТО ДООЕЛ експорт-импорт Крива Паланка. Вработените повеќе денови штрајкува во дворот на фабриката поради неисплатени плати и придонеси на плати за јануари и февруари 2017 година, а штрајкот вчера се пресели и на плоштадот во Крива Паланка.
„И покрај одржувањето на медијациски состанок со претставници на работодавачот, на кој присуствуваа претставници од Хелсиншкиот комитет и Здружението на текстилните и кожарските работници Тивкото мнозинство, со цел итна исплата на платите и придонесите на плати на вработените, бевме информирани од претставниците на работодавачот дека не можат да се исплатат плати и придонеси на плати за вработените бидејќи во моментот фабриката не располагала со парични средства на својата сметка. Потсетуваме, согласно Законот за работни односи, работодавците имаат обврска да им исплатат на работниците плата и придонеси на плата за периоди кои не смеат да бидат подолги од еден месец. Платата се исплаќа најдоцна 15 дена по изминувањето на исплатниот период. Согласно Законот за работни односи, работодавците имаат обврска да им исплатат нето плата и придонеси од плата за пензиско и инвалидско осигурување. Изговорот дека работодавачот нема парични средства на сметката не го ослободува од законската обврска за навремено и редовно исплаќање на плата и придонеси на плата“, се вели во соопштението.
Од комитетот наведуваат дека веќе алармирала за овој проблем, иницирајќи постапка за вонреден инспекциски надзор пред Државниот инспекторат за труд, кој констатирал дека работодавачот КАДОРО ОТТО им ги нема исплатено споменатите плати и придонеси на плати на своите вработени. Инспекторатот издал наредба до работодавачот и одговорното лице да ги отстранат недостатоците, односно на вработените да им бидат исплатени плати и законски придонеси на платите во рок од осум дена од извршениот инспекциски надзор.
„Бидејќи работодавачот не постапи по дадената наредба, Хелсиншкиот комитет испрати барање за продолжување на постапката по извршениот инспекциски надзор во кое побара од Државниот инспекторат за труд да постапи согласно своите законски овластувања и да поднесе барање за поведување на прекршочна постапка. Хелсиншкиот комитет ќе продолжи да го монитрира овој случај, како и останатите случаи на прекршување на работничките права на текстилните работнички и работници и да обезбедува бесплатна правна помош за истите“, стои во соопштението и се повикува компанијата да ги испочитува своите законски обврски и да им исплати заостанатите плати
