Tuesday, May 30, 2017
HomeДЕНЕШНАЕкономијаГолеми загуби трпат и македонските компании од штрајкот на солунското пристаниште

Големи загуби трпат и македонските компании од штрајкот на солунското пристаниште

stopanska komora na makedonija

Штрајкот на солунското пристаниште ги погоди и македонските компании кои зависат од близината за транспорт на стоки и производи и нивните бизниси трпат големи загуби. Тоа доведе до кревање на алармот кај Стопанската комора кои бараат итно решение на проблемот.

Според анкетата направена на 650 компании од страна на Стопанската комора на Македонија, штетни последици трпи целото стопанство, без разлика дали дел од нив непосредно го користат транспортниот коридор-10 или пристаништето во Солун.

Компаниите имаат зголемени трошоци поради кумулирање на трошоците за лежарина на стоките и на контејнерите, имаат дополнителни давачки за пристанишни услуги доколку стоката при увоз и при извоз се преупатува преку други пристаништа како Волос, Пиреја и Патра.

solun pristaniste

– За преземање на контејнерите за увоз од пристаништата Пиреја и Волос минималните дополнителни трошоци изнесуваат околу 800 евра по контејнер, во кои не влегува регуларната цена што е пресметана доколку контејнерите се товараат од Солун. Пристанишните трошоци во Пиреја и во Волос од самиот почеток се осетно повисоки во однос на трошоците во Солун и тоа за 120-180 евра – изјави извршната директорка на Стопанската комора на Македонија, Јелисавета Георгиева.

Македонските компании, исто така, плаќаат високи пенали поради доцнење на договорените испораки. Се создава притисок врз ликвидноста за навремено намирување на финансиските обврски кон партнерите за редовно испорачаната суровина.

– Компаниите имаат непредвидени трошоци за купување дополнителни количества суровини од други партнери по повисоки цени, за запазување на роковите за испорака на производите и за задржување на традиционалните партнери – додава Георгиева.

Компаниите, покрај тоа, имаат трошоци поради оштетување на производите при претоварање, се губи квалитетот на одредени производи и има штета врз лесно расипливата стока. Тие се соочуваат и со откажување на веќе договорените деловни зделки од страна на партнерите поради намален кватитет и непочитување на договорите.

Според менаџерот на компанијата „Комфи Ангел“, Ирена Јакимоска, поради ваквата состојба македонските компании ќе се најдат на дното на листата на доставувачи поради неможноста навреме да ги достават порачките и да ги исполнат договорите.

За ваквата ситуација се алармирани сите надлежни институции, како и постојниот амбасадор на ЕУ во Македонија, Аиво Орав.

Извор: Локално