Голем број верници го исполнија скопскиот плоштад на светата миса за Мајка Тереза
На скопскиот плоштад денеска се одржа понтификална света миса по повод прогласувањето на Мајка Тереза за светица минатиот викенд во Ватикан. Денешната миса на скопскиот плоштад беше централен настан на прославата „Денови на Света Мајка Тереза“, која траеше седум дена. Мисата ја водеше специјалниот папски кардинал, сараевскиот надбискуп Винко Пулиќ. На мисата присуствуваа претседателот, Ѓорѓе Иванов, претседателот на собранието, Вељаноски, министерката за култура и други државници.
Родена во Скопје како Агнеза Гонџа Бојаџиу, Мајка Тереза на 4 септември на плоштадот „Св. Петар“ во Ватикан беше прогласена за светица од папата Фрањо. Мајка Тереза почина во 1997 година во Колката, Индија, а во 1979 година ја доби Нобеловата награда за мир.