Голем базар со многу попусти на македонски дизајн во Јавна соба
Во претстојниот викенд на 9-ти и 10-ти јануари во Јавна соба ќе се одржи нова голема распродажба на производи кои се 100% дизајнирани и произведени во Македонија со што ќе се поддржат нашите дизајнерски брендови, а притоа ќе се прикаже квалитетот и понудата. За купувачите добра вест се големите колективни попусти и можноста да се најде нешто наше и ново на пазарот.
„Ова е голем подвиг за целиот македонски дизајн сектор! За прв пат во една организирана структура истапуваме на домашниот пазар, доделуваме огромни попусти, сé со цел го доближиме македонскиот асортиман до македонските купувачи. За прв пат се одобрува голем колективен попуст на целиот асортиман. Ова е одличен модел на здружување и знак дека активните дизајн брендови можат истиот рецепт да го применат и на странските пазари”, вели Тамара Георгиевска од компанијата “We and Nature”.
Концептуалната продавница во склоп на дизајн центарот Јавна соба од ноември 2015 ги застапува македонските дизајн брендови и ги промовира активно во земјата и надвор. Во склоп на Дизајн базарот се органзирани и работилници за деца, музички настапи како и м изненадувања за публиката. Влезот е слободен а целодневното уживање е загарантирано