Фото: Земјоделци протестираат пред министерството, субвенциите ги нема

Додека владините институции ветуваат дека ќе има итна исплата на субвенциите, земјоделците соочени со огромни проблеми, решија да го покажат својот револт со мал протест пред зградата на министерството за земјоделство во Скопје.

Првиот протест собра помал број на земјоделци од скопскиот регион, но низ цела држава веќе се прават напори за поголема организација на земјоделците кои единствено преку протест гледаат можност да извршат притисок врз власта да си го исполни ветувањето дека ќе ги исплати субвенциите.

Вчера министерот Цветков посочи дека пари има и проблемот не е ниту во министерството за земјоделство, ниту во платежната агенција, туку се чека платните налози да бидат одобрени од министерот за финансии но, бидејќи сите функционираат во техничка влада треба да се најде законска основа.