Еко-герила акција по повод Денот на планетата Земја
Неформалната заедница на еко-активисти „Скопје смог аларм“ денеска по повод 22 Април – Денот на планетата Земја организираше еко-герила акција со порака за борба за чиста животна средина.
Од „Скопје смог аларм“ информираат дека денеска е поставена инсталација со ликот на планетата Земја со тажен израз на „само едно од многуте стотици ‘диви’ депонии во земјава“, односно во населбата Карпош 4 во Скопје, кај мостот „Газела“.
„Во потрага по економски раст и технолошки развој, човештво целосно ја занемари мајката на сите мајки – планетата Земја“, велат еко-активистите.
Целта на оваа еко-герила акција е да се зголеми нивото на свест кај луѓето за тоа каков однос имаме кон животната средина и кон единствената планета на која сите живееме.