Една година затвор за возачот на камион кој усмрти 12 годишно девојче во Хром
Една година затворска казна доби возачот кој пред пет месеци со камион прегази 12-годишно девојче во скопската населба Хром. Во пресудата е утврдено дека и возачот и девојчето поминале на зелено светло, а причина за несреќата е мртвиот агол што настанал кога девојчето почнало да го поминува пешачкиот премин. Возачот, од висината на камионот не го видел девојчето.
Возачот Раде В. доби една година казна затвор, како и една година забрана за управување со моторно возило. Нему му се судеше за кривично дело тешки дела против безбедноста на луѓето и имотот во сообраќајот за кое според законот е предвидена затворска казна од една до пет години.
При носење на пресудата, Судот предвид ги зел олеснителните околности како што се: признавањето вина од страна на обвинетиот, искреното жалење и каење, неговата тешка материјална, здравствена состојба и тоа што никогаш не бил осудуван. Обвинителството има право на жалба на пресудата.