Двајца директори на училишта во Прилеп заработија кривични за злоупотреба на малолетници во политички цели
Директорот на гимназијата „Мирче Ацев” во Прилеп, Кире Николовски заработи уште една кривична пријава за политичкиот говор што им го држеше на учениците, повикувајќи ги да излезат на протест против албанската платформа. Пријавата ја поднел родител на еден од учениците, барајќи одговорност за злоупотреба на децата за политички цели. Претходно, пријава поднесоа од СДСМ – Прилеп против двајца директори на училишта. И директорот Жарко Темелковски заработи кривична за истото дело.
Од Министерството за образование се уште не одлучиле дали ќе се преземат дисциплински мерки против директорот Николовски.
Вчера родителите на децата протестираа во школскиот двор и побараа оставка и одговорност, но директорот Николовски рече дека не се чувствува одговорен. Остри реакции имаше и од граѓанскиот сектор и од Народниот правобранител кои ја осудија постапката на директорот и од институциите побараа да се преземат сите потребни мерки.