Додека ЕБР ги тепаше студентите избран нов лидер на СПУКМ
Во напната и тензична атмосфера која повеќе наликуваше на акционен филм, а не на студентски несогласувања е избран нов лидер на СПУКМ. Доцна синоќа изброени се гласовите и победник е Давор Поповски, студент на ФИНKИ.
„Бараме Универзитетот веднаш да реагира против тепањето на студенти, да не ги признае изборите и да побара истрага за случувањата на УКИМ. Во спротивно, ќе ја опструираме работата на СПУКМ и нема да ги признаваме одлуките на органите на УКИМ“, изјави Ивана Туфегџиќ од Студентскиот пленум.
Од Студентскиот пленум реагираат и за бруталната реакција на полициските специјалци бидејќи насила беа извлечени од пред вратата на канцеларијата на СПУКМ каде мирно седеа и протестираа за однесениот гласачки материјал кој исто така на многу сомнителен начин беше префрлен со кавги, тензии и судири.
СПУКМ повторно соопшти дека се е во ред и дека изборите биле најрегуларни. Нивниот досегашен лидер Спировски доцна вечерта се обиде од задниот влез да излезе од канцеларијата со придружба на ЕБР, но демонстрантите не му дозволија.
„СПУКМ изразува жалење за обидот на Студентскиот пленум да го наруши гласањето за избор на нов студентски лидер, со што уште еднаш покажа дека е политички мотивиран и не работи за студентите и студентското достоинство. Денес и покрај сите подметнувања, притисоци и опструкции на изборите од страна на Студентскиот пленум, победи демократијата и победија студентите со што покажаа дека нема потклекнување на студентското движење на разно-разни политички иницијативи и обиди за политизација на студентското движење“, соопшти СПУКМ.