Friday, Aug 7, 2020
HomeДЕНЕШНАПолитикаЏафери утре ќе закаже седница за разрешувањето на Зврлевски – ќе се работи и викендов

Џафери утре ќе закаже седница за разрешувањето на Зврлевски – ќе се работи и викендов

talatdzaferi_1

Продолжениетo на седницата за разрешување на Марко Зврлевски од функцијата републички јавен обвинител, ќе биде закажано утре, соопшти денеска претседателот на Собранието, Талат Џафери, на прес-конференција на која даваше отчет за првите 100 дена од неговиот мандат.

– Според деловникот, кога заседава Комисијата за финансирање и буџет, не може да има пленарна седница затоа што седниците од Комисијата се емитуваат во живо на собранискиот канал. Откако ќе завршат десетте дена дебата за ребалансот на буџетот, а во овој случај завршуваат утре, може да има пленарна седница и да се работи на заостанатите седници. За разрешувањето на Зврлевски ќе закажам седница утре иако петок е ден за средби на пратениците со граѓаните. Тоа значи дека ако треба, седница ќе закажам и в сабота и в недела – рече Џафери.

Прашан дали тој ќе ја отвори манифестацијата по повод Илинден на 2 Август во Крушево, Џафери нагласи дека постои систем на ротација и дека оваа година редот да се обрати во Крушево му се паѓа на претседателот на Собранието.

Џафери рече дека пратениците ќе го користат одморот од 8 до 25 август, наместо од 6 август, односно откако ќе поминат пет дена дебата на пленарна седница за ребалансот на буџетот, која треба да почне в понеделник. Локалните избори Џафери ќе ги распише на 6 август за тие да може да се одржат на 15 октомври.

– Одморот на пратениците не е моја волја, туку е законска обврска пратениците да имаат одмор во август, но тоа не значи дека ќе им биде дозволено да ги користат сите 31 ден од месецот – додаде Џафери.

За насилниот упад на група граѓани во Собранието на 27 април, Џафери вели дека бил повикан во Обвинителството и како оштетен и како сведок но бидејќи истрагата се уште трае тој не сакаше да даде повеќе детали.

Џафери пресот го држеше прво на албански јазик, а потоа на македонски јазик, и како одговор на прашањето дали е тоа провокација рече дека има уставно право да се обрати на двата јазика и дека е несоодветно тоа да се третира како провокација. За Законот за употреба на јазиците Џафери рече дека најдобро е да се почекаат 100 дена од работата на владата.

За повикот на една од десетте пратенички групи на ВМРО-ДПМНЕ да се закаже итна седница за договорот со Бугарија, Џафери рече дека итноста на седницата е надмината по јавното објавување на договорот.

Условите за работа во првите 100 дена од неговиот мандат, Џафери ги опиша како драстично попозитивни отколку денот кога беше избран пред три месеци, на 27 април. Во отчетот за првите 100 дена, претседателот на Собранието рече дека, имало девет седници од кои четири целосно завршени, дека се донеле 5 закони, дека имало редовни координации секој понеделник со исклучок на ВМРО-ДПМНЕ и дека се одржале 32 меѓународни активности.

Откако ќе заврши годишниот одмор, Џафери најави дека Собранието ќе има нова алатка „Е-прозорец“ преку која граѓаните може да се пријават доколку сакаат да присуствуваат на некоја од пленарните седници.