Девојки програмерки во кампања против сексистички коментари

Во ИТ индустријата се повеќе има квалитетен женски кадар со талент за програмирање и креирање на кодови, апликации и програми. Но, очигледно стереотипите се уште постојат и за оваа професија се мисли дека најчесто е отстапена на мажи со големи очила, несмасни потези и слаби општествени вештини. За присуство на жените воопшто не станува ни збор, особено не ако тие се убави и атрактивни.

Токму таков проблем имаше OneLogin компанијата која објави повеќе постери за вработување на нови програмери, а на еден од постерите е сликана нивната вработена Ајсис Венгер. Веднаш на социјалните мрежи се проширија коментари од шовинисти дека нема никакви шанси волку убава девојка да работи како програмер.

„ Реалноста е дека повеќето од луѓето имаат добро намери, но искрено се слепи за сите глупости кои им се случуваат, а тие не ги перцепираат бидејќи се мажи и тоа нив не ги погодува“ изјави Венгер за Medium бранејќи ја положбата на жените во IT индустријата каде често се случува колегите да имаат сексистички испади.

Нејзиниот пример го прифатија и голем број на жени и девојки кои работат како програмери и софтверски инжинери и ја започнаа кампањата на социјалните мрежи „Јас изгледам како програмер“.