Десет месеци се прибирале докази за осомничените припадници на ИСИС

МВР соопшти дека по наредба на Основното Јавно обвинителство за гонење на организиран криминал и корупција во периодот од септември 2014 година до јули 2015 година се работело на прибирање на докази за осомничените лица кои се поврзуваат со терористичката организација Исламска држава.

Осомничените се товарат за учество во паравоени формации надвор од територијата на Р.Македонија, како и за врбување на регрутите кои се испраќаат на боиштата во Ирак и Сирија за извршување на терористички акции. Со добиените наредби од Судија на претходна постапка, извршени се вкупно 28 претреси во Скопје, Струга, Тетово, Гостивар и Куманово. Меѓу претресените објекти се „Фастнет“ – интернет кафе во Скопје, придружните објекти на Тутунсуз џамија, како и просториите на невладините организации „Искра на милоста“ и „Исламска младина-Сарај“.

Притворени се 9 лица, а по 27 се уште се трага. По завршување на вештачењето, ќе биде поднесен и соодветен извештај до Основно Јавно обвинителство за гонење на организиран криминал и корупција.