Анархисти со молотови коктели удрија по домот на грчкиот државен секретар

Група анархисти со камења и молотови коктели, утрово го нападнаа домот на грчкиот државен секретар Алекос Флампурарис, пренесуваат грчките медиуми. Во инцидентот кој се случил околу 4,30 часот наутро по локално време во атинската населба Екзархија, учествувале околу 40 луѓе, пишува интернет страницата на весникот Прото Тема.

Влезот на зградата е оштетен од огнот. Во нападот со камен е повреден полицаец од обезбедувањето, но благодарение на интервенцијата на силите за брза реакција интервентната полиција избегнато е најлошото, пишува весникот.

Домот на Флампурарис веќе беше цел на два слични напади, во ноември минатата година и јануари годнава, па објектот е под постојана полициска заштита. Ноемврискиот обид да биде запалена неговата куќа, државниот секретар го нарече терористички чин.

Инаку, во областа Екзархија на грчката престолнина се наоѓаат седиштата на многу анархистички групи.