Администрацијата ќе работи сменски или од дома?!

 

Македонија ги живее овие неколку денови, со драматичен раст на новозаразени од Ковид-19 вирусот. Пандемијата, го зема својот есенски бран, и многумина се прашуваат дали нашата држава има институционални и здравствени капацитети да се справи со толкав број на заразени во еден ден, последователно. Веќе психолошката бројка од над 500 во еден ден се надмина. Епидемиолозите предупредуваат дека со несовесното однесување на граѓаните, може да очекуваме и над 1.000 заразени во текот на едно деноноќие.

 

Затоа, Комисијата за заразни болести  ќе ѝ предложи на Владата, државната и јавна администрација, вработените во судовите и општините да работат во смени или во ротација или онлајн согласно условите за работниот процес, најави министерот за здравство Венко Филипче.

Министерот повтори дека Владата  ќе одлучува за последниот пакет мерки кои ги предлага Комисијата, како за тоа сите економски оператори да работат до 23 часот и да се ограничи капацитетот на јавниот превоз до 50 проценти. Филипче се надева дека измените во Законот за заштита на населението од заразни болести ќе се донесат до крајот на неделава.

„Апелирам дека ситуацијата е навистина сериозна. Следен чекор е полициски час“, рече Филипче, но додаде дека се надева дека овој пакет мерки, затоа со тие што ќе се најдат на гласање во Собрание, за носење на маска на отворено и забрана за групирања по дома, ќе дадат резултати.

Филипче кажа дека нема веќе места во болниците во Струмица, Куманово, Штип, Прилеп, дека се отворило уште едно крило во Битола и се полни болницата во Гостивар.