ВМРО-ДПМНЕ: Заев има обврска да и каже на македонската јавност што точно договорил во Софија
Зоран Заев има обврска за транспарентно и инклузивно работење особено кога станува збор за прашања од највисок национален интерес и дека трет ден молчи и бега од одговор, одбивајќи да и каже на македонската јавност што точно договорил во Софија, стои во денешното соопштение од опозициската ВМРО-ДПМНЕ.
– Граѓаните на Република Македонија се вознемирени бидејќи не знаат што точно прифатил Заев во договорот чие потпишување го најави за 2 август. Заев треба да одговори на кои делови од учебниците по историја ќе ги брише и кој ќе одлучи што да се брише? Дали ги прашал за тоа македонските граѓани на кои им ветуваше дебата за секое позначајно прашање? Дали целта на Заев е Македонија, нејзиниот јазик, култура и историја да бидат негирани, се вели во соопштението на ВМРО-ДПМНЕ.
Според опозициската партија, Заев ја обвинува Република Македонија за ширење на омраза и национализам, без притоа да каже каков национализам и омраза покажувала од осамостојувањето до денес, како и дека молчи пред сите изливи на национализам кои се упатени кон земјава, а чии интереси тој како Премиер е должен да ги штити.
Од партија нагласуваат дека граѓаните од СДСМ не очекуваат распродажба на националните интереси и разградување на националното ткиво, туку 16.000 денари минимална плата, 30.000 денари просечна плата, нови 500 километри автопат, а лекарите 100.000 денари плата кои им ги вети.
