Одлуката за притворот на Кочан на јавна седница на Апелација
Во Апелациониот суд на јавна седница, Специјалното јавно обвинителство и одбраната на Сеад Кочан ќе ги соочат аргументите „за“ и „контра“ решението за притвор.
Од Апелациониот суд информираат дека седницата ќе биде јавна на барање на СЈО. По расправата ќе биде донесена и конечна одлука.
Сеад Кочан веќе неколку дена не е достапен за органите на прогонот иако е распишана меѓународна потерница.
Тврдењата на неговиот адвокат дека тој е слободен човек, а решението за притвор е незаконско, за дел од адвокатите се лични толкувања. Според адвокатот Сашо Дуковски законот е јасен – жалбата не го суспендира решението за притвор.
И додека МВР трага по Кочан, во неговите фирми се прават рокади. Порталот Нова ТВ објави дека сопругата на осомничениот бизнисмен , Асмира Кочан, се повлече од менаџерската позиција во „Трансмет Лаб ДООЕЛ“, нов директор сега е Селма Кочан, помлад член на семејството Кочан.
Извор: 24vesti.mk