Терминаторот повеќе нема да се врати

Најновото петто продолжение на популарната филмска франшиза Terminator Genesys е тотален неуспех и публиката очигледно не е заинтересирана да го види враќањето на Арнолд Шварценегер во култната улога на Терминаторот Т-800. Ова е убедливо и најголемата холивудска „бомба“ оваа сезона бидејќи филмот со огромен буџет од 155 милиони долари заработи одвај 25 милиони во кино салите.

Спасот Terminator Genesys ќе го бара од публиката надвор од САД која можеби се уште има желба да го види овој научно-фантастичен филм. Покрај Шварци, се појавуваат Емилија Кларк која ја знаеме како Калиси од Game of Thrones во улогата на хероината Сара Конор, Џејсон Кларк како Џон Конор и Џаи Кортни еден од најлошите актери во изминатите пет години во улогата на Кајл Рис.

Проблемот со Terminator Genesys е во комплицираната приказна која ги меша сите временски интервали со патување низ времето и воопшто го нема шмекот на првите два филма кои до денес не се надминати. Последните два дела на Terminator исто така не беа прифатени од фановите и критичарите, што е доволен знак дека ни е доста од оваа приказна и само со ќеиф ќе си ги гледаме старите филмови.