HomeДЕНЕШНАПолитикаУредникот на ЦИВИЛ пријавил „фантом“ во својот стан, па и самиот станал спорен гласач

Уредникот на ЦИВИЛ пријавил „фантом“ во својот стан, па и самиот станал спорен гласач

По објавувањето на Избирачкиот список на увид и по електронската проверка, уредникот на ЦИВИЛ Медиа, онлајн реагираше до ДИК дека лицето Т. Г., кое според списокот, живее во неговиот стан, е „фантом“, и со право очекуваше надлежните да ја исправат грешката. Наместо тоа, покрај фантомскиот „кирајџија“ Т. Г., на листата на спорни 39.502 гласачи, сега се наоѓа и името на уредникот, иако тој повеќе од деценија, живее на истата адреса со сета документација за сопственост на станот и со лични документи (пасош и лична карта), гласа на истото гласачко место во неколку циклуси и редовно плаќа данок?!

Дали објавувањето на листата од 39.502 наводно спорни гласачи, како единствен „резултат“ до 19 август, ќе има само и само, создавање на уште поголема конфузија за претстојните избори? Иако уште од првиот момент кога ДИК го објави на увид хаотичниот Избирачки список, ЦИВИЛ – Центар за слобода, објавуваше податоци кои ги добиваше од терен како резултат на долгорочното набљудување, (а кои беа и тоа како илустративна потврда за недоследностите во прочистувањето на списокот и отвараа широк простор за сериозни сомневања дека наводната теренска проверка на ДИК, не е доволен механизам за конечно прочистување на списокот и за враќање на довербата на гласачите во изборниот процес), сепак, јавноста се надеваше дека партиските преговори и активностите на ДИК ќе вродат со плод и дека новиот прочистен список нема да биде дотолку контроверзен.

ЦИВИЛ ги повика сите граѓан(к)и да ја извршат својата граѓанска должност, да проверат дали се дел од новата листа и ако тоа е случај – да се пријават, за да придонесат кон пречистувањето на Избирачкиот список и кон обезбедувањето услови за фер и демократски избори.

Но, искуството покажува дека граѓаните за тоа можат да бидат и казнети поради катастрофалната ситуација со списоците/листите.

„Од оправдани причини не бев во можност веднаш да реагирам на Јавниот повик за пријавување на граѓани чии што записи во Избирачкиот список по извршените вкрстени и теренски проверки се спорни записи, односно, за кои има несовпаѓање на податоците за граѓаните – предмет на проверки во Избирачкиот список, но денеска, колегите новинари ме известија дека и мене ме ‘нашле’ во спорните гласачи?!“, вели Синиша Станковиќ, уредник на ЦИВИЛ Медиа.

„Иако по три децении во новинарството, ми е сосема јасно до кое дереџе е стасана кутрава држава, на кој било план што подразбира минимум организација и координираност, сепак се надевав, дека откако сигнализирав за ‘фантомот’ кој нели, според власта, живее во мојот стан, некој нешто и ќе преземе. Наместо тоа, иако никој не ме ‘вкрстувал’, ниту теренски проверувал, и самиот станав спорен гласач! А лицето Т.Г. ниту живее, ниту живеело на мојата адреса во последниве 20 години! И сега, наместо ДИК да се справува со сопствените валкани алишта, поради нечија неспособност и неграмотност, треба јас самиот, или да се тормозам да исправам туѓи грешки, па да одам во подрачните единици на Државната изборна комисија, или во канцелариите на Управата за водење на матични книги, или пак, да ризикувам, ако не го испочитувам рокот, да не бидам внесен во списокот на гласачи и да не можам да гласам. Тотално лудило! Во Македонија последнава деценија навистина се е можно, ама ова е невиден резил што ја проблематизира способноста и особено политичката волја на власта воопшто да организира било какви избори…“, вели Станковиќ.

Според Станковиќ, добро е што ДИК; објавила на веб-страницата Кодекс за набљудување на процесот за пријавување на граѓан(к)ите, а уште поубаво е што ќе се спроведува и медиумска кампања со спотови и преку пласирање потребни информации и преку пошта. Но, тој бара конкретна одговорност и одговор на прашањето – како одеднаш се нашол меѓу 90-те „спорни“ гласачи од неговата општина.

„Најверојатно ќе мора, според примерот на почитуваниот дипломат Сашко Тодоровски и јас јавно да побарам од ДИК, да спроведе внатрешна истрага за тоа како моите лични податоци се нашле меѓу ‘спорните’, а ако на изборите не ми биде овозможено да гласам, да ја тужам ДИК, или одговорните лица кои внатрешната исграга би ги посочила како виновници, со намера или од некомпетентост, сеедно. Не знам, не можам да тврдам дека се работи за ‘позајмување’ на УСБ од некоја личност од ДИК, за намерен фалсификат, за изборен криминал, ама…., да не е ептен тажно, би било многу смешно. Ова е карикатура, а не подготовка за ‘кредибилни’ избори“, вели Станковиќ.

извор:Цивил

Social Media Auto Publish Powered By : XYZScripts.com