HomeДЕНЕШНАРегионВиси на конец судбината на над 1.800 вработени во грчките телевизии

Виси на конец судбината на над 1.800 вработени во грчките телевизии

Над 1.800 новинари, техничари и вработени во грчките телевизии може да останат на улица поради новите измени во грчкиот телевизиски простор. Судбината на телевизиите кои не успеаа да обезбедат национални телевизиски концесии виси во воздух и илјадници новинари не знаат што ќе се случува со нив откако ќе поминат трите месеци неопходни за да се спроведат промените по завршувањето на владината аукција за концесии.

По жестоки реакции од новинарите за индиферентноста на грчкото Здружение за новинари кон целиот процес, од Здружението вчера најавија потенцијални 24-часовни штрајкови и прекини на работата на медиумите во знак на протест против владината одлука за ваков тип на регулација на медиумскиот простор и принудно затворање телевизии.

Од таму предупредуваат дека неизвесна е и иднината на новинарите во телевизиите кои обезбедија концесија, бидејќи поради високите суми платени за неа можно е да дојде до нови отпуштања или намалување на платите.

Здружението на новинари бара од владата да не се дозволи да се затворат телевизиите без концесии и да се загарантираат работните места на новинарите и останатите вработени, како и да се гарантира слободата на размена на идеи и слободното медиумско информирање на граѓаните.

За потсетување, грчката влада на аукција додели само четири концесии и тоа две на постоечки телевизиски куќи „Скај“ и „Антена“ и две на нови медиумски куќи кои ќе се формираат и ќе почнат да работат во следните три месеци. Останатите телевизии како „Мега“, „Алфа“, „Стар“ и „Епсилон“ не успеаа да обезбедат концесија и според најавите по три месеци ќе треба да го згаснат својот сигнал. Во државната каса од аукцијата за ТВ концесии влегоа дополнителни 246 милиони евра, пари кои грчкиот премиер Алексис Ципрас најави дека ќе се искористат за помош за ранливите групи во државата.

Social Media Auto Publish Powered By : XYZScripts.com